Las plontas flurentas

Terraviva

Referenzen.

Einen Einblick über das Tun und Wirken von Terraviva vermitteln Ihnen die aktuellen und abgeschlossenen Projekte.

La jarva steria

Naven dil zercladur tochen igl uost tarlischa la jarva steria violetta ellas gondas dalla Ruinaulta. Sco ferm cuntrast marchescha ina bulscha oranscha glischonta il plaz da setschentar per ils insects. La jarva steria robusta vegn mo 10 cm aulta e sederasa en plumatschs flurents denter la crappa.

La feglia-camutsch

Ils plumatschs glischonts dalla feglia-camutsch ein nunsurveseivels il zercladur e fenadur. Suenter che las flurs da 2-4 cm ein sfluridas, orneschan ils portasems da colur cotschnauna e d’argien sco pigns penels ils spess plumatschs verds. La plonta semperverda s’auda tier las caglias bassas inclinadas e sa vegnir varga 100 onns veglia.

La puliglia melna

La puliglia melna ei ina caglia bassa semperverda che sa vegnir 30 cm aulta. Ella crescha en uauls da tieus clars e caltschinus. Dil mars tochen il zercladur sesarvan las flurs alvas e mellen-oranschas tochen cotschnas che vegnan impollinadas mo dils tavauns.

La balsamina cun glondas

La balsamina cun glondas ei vegnida importada ell’Europa el 19avel tschentaner sco plonta decorativa. Ina suletta plonta producescha tochen 4000 sems che san vegnir sdermenai tochen 7 m lunsch. Ella sederasa fetg spert per liung dallas auas e scatscha pervia da sia spessezia las plontas indigenas. La balsamina cun glondas ei ina neofita invasiva che sederasa a moda aschi rasanta ch’ella sto vegnir cumbattida.

La spina da Rein

Las coclas dalla spina da Rein ein enconuschentas per lur gronda concentraziun da vitamin C. La caglia cun sia feglia brin-verda lai denton buca racoltar senz’auter ses fretgs. Cun sias fermas spinas sedosta ella encunter eventuals «laders». La spina da Rein s’auda tier las aschinumnadas plontas bicasanas. Quei vul dir ch’ei dat plontas masculinas e femininas. Las pintgas flurs sesarvan aunc avon che la feglia ei catschada.

La caglia da suspidaunas

La caglia da suspidaunas fa bunamein duront tut las stagiuns parada. La primavera tarlischan las flurs alvas, la stad las coclas blauas ed igl atun porta la feglia cotschna colur ellas costas grischas e carpusas. La caglia da suspidaunas porscha nutriment a biars insects, a tschittas ed ad utschals e contribuescha fermamein alla biodiversitad dalla Ruinaulta.