Tips da passatemps ella Ruinaulta
La Ruinaulta porscha bia variaziun. Per che Vus munchenties negin punct culminont, havein nus preparau per Vus ina bucketlist cun las pli bialas excursiuns ed ils megliers tips. Tuttina, sche Vus s’interesseis plitost per il sport, la culinarica ni la cultura – cheu anfleis Vus segir e franc Vies highlight persunal.
Terraviva
Referenzen.
Einen Einblick über das Tun und Wirken von Terraviva vermitteln Ihnen die aktuellen und abgeschlossenen Projekte.
Tura da riverrafting
In’excursiun en canu sin il Rein Anteriur porscha gest plirs eveniments unics enina. Contemplar la cuntrada impressiunonta naven dall’aua, remar plein forza tochen al proxim obstachel e dustar la fom cun in picnic communabel. E per finir aunc in’empermischun: en vestgadira schetga banduneis Vus cun garanzia buc il canu.
La nixa da Valendau
Sin il cadruvi da Valendau, che stat sut protecziun naziunala, sesanfla la pli gronda fontauna da lenn dall’Europa. Sin la petga-fontauna paradescha ina nixa miez niua che porta ina capiala florentina. Gest davostier ei l’enconuschenta ustria «Gasthaus am Brunnen» che porscha era plazs da seser al liber. L’ustiera ed igl ustier dil restaurant distinguiu da Gault Millau surveschan a Vus numerusas specialitads regiunalas plein fantasia.
La senda culinarica
Ina senda – treis locals. Sin la senda culinara «uaul ed aua» scuvris Vus buca mo las bellezias naturalas, mobein era las attracziuns culinaras da nossa regiun. Vus partis naven da Flem Casa d’Uaul, nua che Vus maglieis l’emprema tratga el «Bistro Kaufmannfrauen». Pli tard spassegeis Vus sper il Lag la Cauma vi per liung dalla Ruinaulta ed arriveis a Conn, nua che Vus saveis guder la tratga principala. Suenter ina cuorta excursiun sin la plattaforma panoramica «Il Spir» viandeis Vus al Lag la Cresta, nua che Vus astgeis guder il dessert avon che returnar a Flem tras la cavorgia impressiunonta dallas Auas Sparsas.
Tura dad e-bike tras la Ruinaulta
La ruta 260 meina Vus tras l’entira Ruinaulta cun ses uauls miraculus e ses bellezia lags da far bogn cun vesta sin la cuntrada alpina circumdonta. Buca mo il contuorn ei tut auter che monotons, era las sendas porschan bia variaziun. Ei dat cheu vias da catram, vias d’uaul e singletrails. Tgi che ha ina buna cundiziun, fa quella tura da velo en in di. Tgi che vul guder la cuntrada en tutta calma ni tgi che ha gust da dar in segl els lags rinfrestgonts, sa era reparter la tura en pliras etappas dil di ni scursanir ella cun prender per certs tschancuns ils mieds publics.
Il Lag la Cauma
Il Lag la Cauma vala sco la pèrla da Flem. Senudar, smarschanar ni star a sulegl: ina pausa sper quei bellezia lag fa da Vossa excursiun in di nunemblideivel, tuttina, sche Vus essas da viadi a pei ni cun il bike. Il Lag la Cauma sesanfla amiez igl Uaul da Flem ed impressiunescha surtut cun sia aua clara verda turchis rinfrestgonta. La stad ha l’aua ina temperatura denter 17 e 24 grads. Far bogn el Lag la Cauma s’auda semplamein sin mintga bucketlist dallas vacanzas da stad en quella regiun!
Excursiun da Versomi a Valendau
L’excursiun entscheiva alla staziun da Versomi, amiez il monument natural impressiunont dalla Ruinaulta. Adina per liung dil Rein e cun l’egliada sin las preits crap e las formaziuns da grep fascinontas suandeis Vus la senda da viandar tras la cavorgia en direcziun da Valendau. Ella meina Vus adina puspei tras uauls ed englars e porscha ina biala vesta sin la cavorgia e las muntognas circumdontas. La via serpegia baul ensi, baul engiu, seslarga mintgaton e daventa lu puspei pli stretga. Igl ei in’excursiun sempla ed adattada per famiglias. Denteren veseis Vus era a vargar la Viafier retica sin sia ruta tras il «Swiss Grand Canyon» e la stad saveis Vus observar cajacs e barcas da riverrafting sin il flum. Alla fin dalla spassegiada envida il café alla staziun da Valendau da far in paus e da guder enzatgei da magliar ni da beiber avon che returnar cun la Viafier retica.
Terraviva
Referenzen.
Einen Einblick über das Tun und Wirken von Terraviva vermitteln Ihnen die aktuellen und abgeschlossenen Projekte.
